DNK NEWS DESK- ଦକ୍ଷିଣ ଆଫ୍ରିକା ବିପକ୍ଷରେ ୩ୟ ଦିନିକିଆ ମ୍ୟାଚ ସହିତ ୨-୧ରେ ସିରିଜ କବ୍ଜା କରିଛି ଟିମ ଇଣ୍ଡିଆ। ୨୭୧ ରନର ବିଜୟ ଲକ୍ଷ୍ୟକୁ ପିଛା କରି ଭାରତୀୟ ଦଳ ୬୭ ବଲ ବାକି ଥାଇ ମ୍ୟାଚକୁ ଜିତି ନେଇଛି। ଯଶସ୍ବୀ ଜୟସୱାଲଙ୍କ ଶତକୀୟ ପାଳି ଏବଂ ହିଟମ୍ୟାନ ରୋହିତ ଶର୍ମା ଓ ବିରାଟ କୋହଲିଙ୍କ ଅର୍ଦ୍ଧଶତକୀୟ ଇନିଂସ ବଦଳରେ ଦଳ ସହଜରେ ଶେଷ ଦିନିକିଆରେ ବିଜୟ ହାସଲ କରିଛି।
ଟସ ଜିତି ଭାରତ ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ ଆରମ୍ଭ କରିଥିବା ଭ୍ରମଣକାରୀ ଦଳ ଆରମ୍ଭରୁ ଆକ୍ରମଣାତ୍ମକ ଢଙ୍ଗରେ ରନ ସଂଗ୍ରହ କରିଥିଲା। ହେଲେ ଟିମ ଇଣ୍ଡିଆର ଦୁଇ ବୋଲର ପ୍ରସିଦ୍ଧ କ୍ରିଷ୍ଣା ଏବଂ କୁଳଦୀପ ଯାଦବଙ୍କ ଘାତକ ବୋଲିଂକୁ ସାମ୍ନା କରିପାରି ନ ଥିଲେ ଦକ୍ଷିଣ ଆଫ୍ରିକା ବ୍ୟାଟ୍ସମ୍ୟାନ। ଏକଦା ୧୬୮ ରନରେ ୨ଟି ଉଇକେଟ ହରାଇଥିବା ଏହି ଦଳ ମାତ୍ର ୨୭୦ ରନରେ ଅଲଆଉଟ ହୋଇଯାଇଥିଲା। କୁଇଣ୍ଟନ ଡି’କକ ଏକମାତ୍ର ଖେଳାଳି ଭାବେ ଶତକ ହାସଲ କରିଥିଲେ। ଭାରତ ପକ୍ଷରୁ ଉଭୟ ପ୍ରସିଦ୍ଧ ଏବଂ କୁଳଦୀପ ୪ଟି ଲେଖାଏ ଉଇକେଟ ନେଇଥିଲେ।
୨୭୧ ରନର ବିଜୟଲକ୍ଷ୍ୟକୁ ପିଛା କରି ଟିମ ଇଣ୍ଡିଆର ଦୁଇ ଓପନର ରୋହିତ ଶର୍ମା ଏବଂ ଜୟସୱାଲ ଧିମା ଆରମ୍ଭ କରିଥିଲେ । ପ୍ରଥମ ଉଇକେଟରେ ଏହି ଯୋଡ଼ି ୧୫୫ ରନ ସଂଗ୍ରହ କରି ଦୃଢ଼ ମୂଳଦୁଆ ପକାଇଥିଲେ। ପ୍ରଥମ ଉଇକେଟ ଭାବେ ରୋହିତ ୭୫ ରନ କରି ଆଉଟ୍ ହୋଇଯାଇଥିଲେ । ପରେ କୋହଲି ପଡ଼ିଆକୁ ଆସିଥିଲେ। ଉଭୟେ କୋହଲି ଏବଂ ଜୟସୱାଲ ଲଢ଼ୁଆ ବ୍ୟାଟିଂ ପ୍ରଦର୍ଶନ କରି ୩୯.୫ ଓଭରରେ ବିଜୟ ଲକ୍ଷ୍ୟ ହାସଲ କରିନେଇଥିଲେ। ଜୟସୱାଲ ୧୧୧ ବଲରେ ନିଜର ଶତକ ପୂରଣ କରିଥିଲେ। ସେ ମୋଟ ୧୨୧ ବଲ ଖେଳି ୧୧୬ ରନ କରିଥିଲେ। ସେହିପରି କୋହଲି ପଛରେ ଆସି ଅର୍ଦ୍ଧଶତକ ହାସଲ କରିଥିଲେ।
ଅନ୍ୟପଟେ ରୋହିତ ଏକ ନୂଆ ରେକର୍ଡର ଅଧିକାରୀ ମଧ୍ୟ ହୋଇଛନ୍ତି । ସେ ଅନ୍ତର୍ଜାତୀୟ ମ୍ୟାଚରେ ୨୦ ହଜାର ରନ ପୂରଣ କରିଛନ୍ତି । ୪୩୮ ଇନିଂସରେ ସେ ଏହି ସଫଳତା ହାସଲ କରିଛନ୍ତି। ପୂର୍ବରୁ ଏହି କ୍ଲବରେ ସଚିନ ତେନ୍ଦୁଲକର, ରାହୁଲ ଦ୍ରାଭିଡ ଏବଂ ବିରାଟ କୋହଲି ରହିଛନ୍ତି। ୪ର୍ଥ ଭାରତୀୟ ଭାବେ ସେ ଏହି ରେକର୍ଡର ଅଧିକାରୀ ହୋଇଛନ୍ତି।
